nitc ke rang munch par pehla kadam ....

namskaar...is nitc yatra vrittaant ka important stage to yahi tha ki humne calicut ki paawan bhumi par apne kadam rakh diye the. ab papaji ke mann me tha ki jaldi se apne bete ki kalashaala ke darshan kar liye jaayen par humaare mann me kuch aur hi tha...(tabhi Krissh release hui thi ) . par papaji ke kahe anusaar humne wahin paas me hi ek lodge me room liya wahan saman rakha , fresh huye aur chal pade palayam bus stand ki ore. sach kahen to bas searh karne me tanik bhi pareshaani naa hui . bus ke aage jo likha tha REC-NIT.
aur fir poore raaste bus waale se ek hi sawaal "aa gaya kya bhaia REC" , aur uska ek hi jawab "ayega baba ayega " . aur mai shayad lucky tha jo bus ki us side pe baitha tha jahan se 12th mile ka "Welcome to nitc campus " board dikhta hai .aur bas fir kya dil ki dhadakan aur PT Usha ki atma jaise olympic khelne lage hon.Aur fir 3 din pahle ghar se nikale raahi kisi tarah nitc ki pavitra bhumi ke sparsh kar sake . Aisa laga jaise hum pahle se hi is jagah se vaakif hain aur bina kisi dikkat ke hum main gate se andar gaye aur main building tak ka ek round maarkar bina kuch kiye bina kuch pooche waapas bus stand par , kyonki tab Krissh nitc par bhaari pad raha tha aur hum apni nitc ke rang munch ka keval gate pass dekhkar waapsa aa gaye usi lodge par jahan hum ruke the ......abhi bhi shayad nitc ki life chaalu nahi hui thi ...uske liye intejaar kijiye agale post kaa.................

jab nikale ghar se nit calicut ke liye

Waise to jis din NIMCET ka result mila NITC se apna bandhan jud chuka tha par pata nahi kyon dil ke kisi kone me ek kami si rah gayi thi.shayad wo kami nahi ek darr tha apne degree ke saathiyon ko chorane kaa yaa dil bekarar tha naye doston se milane ke liye, jo bhi ho apna charcha to har jagah fail chuka tha ki ladke kaa nitc me selection ho gaya hai . Par meri khusi to poori tabhi hoti jab mai poori tarah se join ho jata. aur aakhirkaar wo din aa hi gaya jab humne subah subah Kotma station se apne NITC ki yatra ka subharambh kiya.45 minut ka safar poora karke hum Anuppur station pahunche par wo 45 minut aisa laga ki border film ka sunil shetty mai hi hoon aur mujhe border par jana pad raha hai wo bhi aadhi raat ko.har wo cheej jo train se ,mai apni dono aankhon se dekh sakta tha ,maine aise dekha jaise shayad mai fir kabhi unhe dekh nahi paaungaa , aur fir poore safar me ek hi khayal dil me ki kaise honge wo log jinke saath mujhe aage ke teen saal bitane hain , saath me pitaji the aur mujhe dekh unhe aisa lag raha tha ki mai shayad ragging ke darr se saant hoon , aur fir kya , har aadhe ghante me ek baar mujhe wo apni baat se Sikandar yaa kaho Hitalr jitna mahan prove kar dete aur mai khush . yehi silsila chala chennai tak . jab raat 12:00 baje hum chennai se choote to dil ki dhadkane kuch soch soch ke apne aap hi tej hone lagi aur kab hum keral ki haseen vaadiyon me utar gaye pata bhi nahi chala,aur fir karib 9:00 baje ke aaspaas hum shayad palghat ke karib the aur thand se haalat kharab thi fir bhi na jaane kyon train ke darwaaje ke paas khade hokar us scene ko jiski tulana us samay mera dimaag HARRY POTTER ke kisi film ke scene se karne laga tha , dekhne ke liye mai karib aadha ghanta darwaaje par hi khada raha .Jab mai waapas apne berth par gaya to papa ne kaha kuch khaayega aur ishara ek keral ki item 'ladki nahi' , food item ki taraf kiya , tab mai us item kaa naam bhi pronounce nahi kar paya tha aur ab bhi nahi , mai use podambari kahta tha , wo tha ek pake kele ka pakuada , maine jhat se chaar le liya aur pahla tukda muh me rakhte hi raat ko chennai me khaya hua bhi baahar aa gaya , bas wo hi mera keral me pahla aur yaadgaar incident ya kahen accident tha . aur phir hum shornur me utar kar ek passenger me calicut ravana ho gaye . Ab har pal nigaahen har station ke board par calicut dhoondane lagi aur aakhirkaar hum ek station par ruke jahan kaafi log utar rahe the aur station par kuch ajeeb sa " KOZHIKODE " likha hua tha aur tabhi jo humaare liye ab normal hai ek keral ke sajjan purush ne bina pooche hi hume bataya ki yehi calicut hai bhala ho keral wasiyon ka jo bina kahe hi help ke liye taiyaar rahate hain aur hum chalti train se kisi tarah se keral ki is paawan bhumi par apne charan kamal utar hi diye . Aage ki kahani hum apne agale post me kahenge waise bhi ye humara pahla blog hai...........